Reagon Shaqiri: Nuk mund ta di historikun e secilit që kërkon fotografi me mua

Futbollisti kosovar që luan për Zvicrën, Xherdan Shaqiri, ka reaguar pas shkrimeve të mediave zvicerane për fotografimin dhe pritjen në shtëpi të imamit të Xhamisë së Madhe, Shefqet Krasniqi.

Pas publikimit të fotografisë, ku shihet Xherdani me imamin Krasniqi, mediat zvicerane kanë shpërthyer, duke e akuzuar pse Shaqiri është takuar me imamin e arrestuar për dyshime në lidhje me terrorizëm.

Ndaj këtyre shkrimeve ka reaguar vetë Xherdani në faqen e tij në “Facebook”. Futbollisti i Interit ka thënë se me Krasniqin është fotografuar sikurse me çdo tifoz tjetër dhe nuk ishte në dijeni për historikun e tij.

“Një fotografi imja me imamin Shefqet Krasniqi e ka bërë internetin të merakoset pa arsye”, shkruan Shaqiri.

“Imami erdhi tek unë dhe kërkoi të fotografohej me mua, sikurse kanë bërë mijëra tifozë të tjerë. Unë u fotografova, pasi që të refuzoja do të ishte e pasjellshme. Që imami ishte i lidhur me terrorizëm, unë nuk e dija. Nuk mund ta di historinë e secilit që kërkon fotografi me mua”, thotë ai në reagimin e tij, transmeton albinfo.ch.

“Por, ajo që unë dënoj, është fakti kur njerëzit përdorin popullaritetin tim për përfitime personale dhe mediat nxisin urrejtje pa nevojë”, thuhet më tej në reagim.

“Ne Shaqirët jemi të besimit mysliman! Çdo gjë që lidhet me radikalizëm është larg nesh. I juaji, Xherdani”, përfundoi reagimin Xherdan Shaqiri.