Refugjati nga Kosova mbyt gjermanin në ballkonin e banesës së tij

viktima në orën shtatë të mëngjesit të së mërkurës së kaluar ishte goditur me një shishe të birrës, ndërsa më pas është mbytur me një jastëk

Tri ditë pasi u gjet trupi i pajetë i Udo Z. (50-vjeçar) në ballkonin e banesës së tij në Freiberg të Gjermanisë, të premten e kaluar është arrestuar një i dyshuar. Sipas gazetës gjermane Bild, i arrestuari është një 21-vjeçar me prejardhje nga Kosova.

“Një i dyshuar është arrestuar të premten. Ai tani gjendet në paraburgim”, ka thënë një zëdhënës i policisë, përcjell albinfo.ch.
Siç bëhet e ditur, viktima në orën shtatë të mëngjesit të së mërkurës së kaluar ishte goditur me një shishe të birrës, ndërsa më pas është mbytur me një jastëk.

Ndërkohë, gazeta tjetër gjermane “Freie Presse” njofton se i dyshuari është azilkërkues nga Kosova dhe arrestimi i tij është bërë në qendrën e azilit në Chemnitz, përcjell albinfo.ch.

Udo Z. ishte fans i pasionuar i ekipit futbollistik BSC Freiberg, kurse më herët ishte edhe trajner i të rinjve të këtij klubi.