Kosova

Rexhep Selimi sot niset drejt Hagës, Kurti: Padrejtësia speciale vazhdon

E enjte, 5 Nëntor 2020 - 8:20 albinfo.ch

Ish-komandanti i UÇK-së, tash shef i Grupit Parlamentar të Lëvizjes Vetëvendosje, Rexhep Selimi, sot do të udhëtojë në Hagë, raporton Gazeta Express.

Selimi mbrëmë ka njoftuar se i është konfirmuar aktakuza nga Tribunali Special, përmes një shkrimi në Facebook.

I pari i deputetëve të LVV-së ka thënë se ka marrë konfirmim mbrëmë se ka një aktakuzë të konfirmuar nga Dhomat e Specializuara.

Ai tha se do të përballet më këtë sfidë që i është bërë UÇK-së.

“Unë po shkoj me kokën lart dhe kurdo që kthehem do të kthehem po ashtu me kokën lart, sepse isha, jam dhe do të jem ushtar i Ushtrisë Çlirimtare të Kosovës, për të cilën jam i gatshëm të jap gjithçka nga vetja ime. Ideali i asaj ushtrie të lavdishme është mbi mua, mbi këdo, mbi gjithçka. Mirë u takofshim në fitoren e Ushtrisë Çlitimtare të Kosovës! Kam ditur e do të di gjithmonë ta mbroj lirinë e popullit, shtetin e Kosovës dhe UÇK-në e lavdishme”, tha dje Selimi.

EULEX-i dhe Policia e Kosovës dje kanë pasur një aksion disaorësh në shtëpinë e ish-zëdhënësit të UÇK-së e ish-kryeparlamentarit Jakup Krasniqi.

Pas 10 orësh bastisjeje, Krasniqi u arrestua, derisa avokati i tij tha se ai ka një aktakuzë të konfirmuar dhe pritet të dërgohet në Hagë.

Nga ana tjetër, Albin Kurti, kryetar i Vetëvendosjes, është shprehur kundër kësaj Specialeje, dhe se kjo e ka gëzuar shtetin e Serbisë.

Postimi i tij:

Padrejtësia speciale vazhdon. Kryetarit të Grupit tonë Parlamentar, anëtarit tonë të Kryesisë, deputetit të katër legjislaturave të fundit të Kuvendit të Republikës, Rexhep Selimit, Dhomat e Specializuara ia konfirmuan aktakuzën sot pasdite. Më herët gjatë ditës, policia e EULEX-it ka bastisur shtëpinë e ish Kryetarit të Kuvendit të Kosovës, Jakup Krasniqi.

E dimë që sonte janë gëzuar udhëheqja e Serbisë, me presidentin e tyre në krye, dikur ministër i Milosheviqit, e që në botë shtiret si djalosh joproblematik. E dimë që është gëzuar edhe Kryetari i Kuvendit të Serbisë, dikur zëdhënës i partisë së Milosheviqit, meqë neve na e arrestuan zëdhënësin e UÇK-së i cili ishte edhe Kryetar i Kuvendit të Kosovës kur u shpall pavarësia. E dimë që sonte festohet në Beograd, sepse e kishin tmerr Rexhën para e gjatë luftës teksa vëllain Asllanin ia mbanin peng në burgjet e Serbisë. E dimë. Por, nuk do t’u zgjasë fort kjo festë, sepse Republika e Kosovës nuk kthehet prapa e shqiptarët po bëhen komb i barabartë me të tjerët.

10-shi i luftës sonë çlirimtare, gjithnjë e ka mbrojtur UÇK-në sepse e ka kuptuar mirë dhe e ka dashur shumë atë, sepse e ka bërë publike dhe e ka afirmuar UÇK-në, sepse nuk është ndarë kurrë nga Jasharët e Prekazit, sepse asnjëherë pasluftës nuk ka votuar në dëm të luftës çlirimtare e të shtetit të Kosovës, të lirisë së popullit e të mirëqenies së qytetarëve.

Kjo gjykatë speciale do të na gjykojë Rexhën tash, gjeneralin e luftës dhe deputetin e paqes, por normalisht që historia dhe ardhmëria jonë do ta gjykojnë këtë gjykatë. Rexha është veteran sepse shumë moti është luftëtar. Rexha nuk është veteran sepse nuk pensionohet dot. Dikur luftonte në UÇK. Tash do të luftojë për UÇK-në. Rexha është krenar me gjithë çka bërë. Ne jemi krenarë me Rexhën.