Rritje mbi 40% e shërbimeve konsullore të Kosovës në Cyrih gjatë vitit 2025

Konsullata e Republikës së Kosovës në Cyrih forcon besimin e mërgatës dhe zgjeron aktivitetet diplomatike e kulturore

Konsullata e Republikës së Kosovës në Cyrih ka shënuar një vit shumë të suksesshëm në fushën e shërbimeve konsullore dhe angazhimit me komunitetin shqiptar në Zvicër.

Sipas Konsullit të Kosovës në Cyrih, z. Vigan Berisha, gjatë vitit 2025 është regjistruar një rritje prej mbi 40% e numrit të shërbimeve konsullore, krahasuar me vitin 2023. Ky zhvillim tregon rritjen e kërkesës nga qytetarët, por njëkohësisht edhe besimin gjithnjë e më të madh të mërgatës në punën dhe shërbimet e Konsullatës.

“Viti 2025 shënon një angazhim të shtuar të Konsullatës, duke reflektuar përkushtimin tonë ndaj qytetarëve dhe përmirësimin e vazhdueshëm të cilësisë së shërbimeve”, ka theksuar Konsulli Berisha.

Gjatë këtij viti janë realizuar mbi 250 takime dhe aktivitete, brenda dhe jashtë konsullatës, duke përfshirë bashkëpunime me autoritetet vendore zvicerane, korin konsullor, si dhe aktivitete kulturore e promovuese. Këto aktivitete kanë ndikuar drejtpërdrejt në forcimin e lidhjeve institucionale, diplomatike dhe kulturore ndërmjet Kosovës dhe Zvicrës.

Në përmbyllje të vitit, Konsulli Berisha ka shprehur mirënjohje të veçantë për mërgatën shqiptare në Zvicër, duke falënderuar gjithashtu kolegët diplomatë, stafin vendor, mediat, shoqatat dhe autoritetet e vendit pritës për bashkëpunimin dhe partneritetin e vazhdueshëm.

“Konsullata e Republikës së Kosovës në Cyrih do të vazhdojë edhe në vitet në vijim të ushtrojë mandatin e saj me përgjegjësi, transparencë dhe profesionalizëm, në shërbim të qytetarëve dhe interesit të Republikës së Kosovës”, ka përfunduar ai.

---