SBB: Nga 2027 më shumë lidhje ndërkombëtare drejt Francës dhe Italisë

(KEYSTONE/Gaetan Bally)

Hekurudhat Federale Zvicerane (SBB) kanë prezantuar projektin e orarit të ri të trenave për vitin 2027, i cili sjell kryesisht forcim të lidhjeve ndërkombëtare, sidomos drejt Francës dhe Italisë.

Sipas planit, nga 5 prilli 2027 do të rikthehen tre trena TGV në ditë në linjën Lozanë–Paris përmes Gjenevës, duke përmirësuar ndjeshëm lidhjen me kryeqytetin francez. Po ashtu, do të hapet një linjë e re Gjenevë–Lyon, me kohë udhëtimi më të shkurtër për rreth 10 minuta.

Në drejtim të Italisë, nga Zyrihu do të ketë dy trena të drejtpërdrejtë në ditë për Venecia, ndërsa linja për La Spezia përmes Genovës do të bëhet e përditshme. Përmirësime parashikohen edhe në linjën Zyrih–Shtutgart, ku pritet rritje e saktësisë së orareve.

SBB njofton gjithashtu zgjerim të trenave të natës “Nightjet”, përfshirë linjën Zyrih–Amsterdam, si dhe shërbime të reja ose të përforcuara drejt Hamburgut dhe Vjenës.

Në Zvicrën frankofone ndryshimet janë më të vogla, me lidhjen e Orbes me RER Vaud dhe përforcim të disa linjave në rajonin e Gjenevës.

Megjithatë, SBB paralajmëron se punimet e shumta infrastrukturore mund të shkaktojnë ende ndërprerje në qarkullim gjatë vitit 2027. Konsultimi publik për orarin e ri hapet më 22 maj.