Scott : SHBA-ja s’përfshihet në udhëheqjen e dialogut Kosovë-Serbi

Ambasadori i Shteteve të Bashkuara të Amerikës në Beograd, Kyle Scott, ka hedhur poshtë mundësinë e përfshirjes së Uashingtonit në dialogun Kosovë-Serbi, pasi ky proces, sipas tij, është duke u udhëhequr nga BE-ja në mënyrën më të mirë të mundshme.

Në një intervistë për Telegraf TV, ai tha se vendi i tij do të bëjë gjithë atë që është në fuqinë e tij dhe të propozojë gjërat ose të qetësojë situatën kur të jetë e nevojshme, por në fund të fundit, duhet të ketë një marrëveshje të drejtpërdrejtë mes Beogradit dhe Prishtinës, përcjell albinfo.ch.

“Nuk mund të flasim për zgjidhje afatgjatë të këtij problemi pa një marrëveshje direkte mes udhëheqjeve të Beogradit dhe Prishtinës. Ky është synimi ynë, ky është synimi i dialogut në përgjithësi. Në fund të fundit, kjo duhet të jetë një marrëveshje direkte mes Beogradit dhe Prishtinës”, ka deklaruar ai.