SHBA nuk rekomandon udhëtimet në Kinë

Departamenti amerikan i Shtetit u kërkoi qytetarëve dje në mbrëmje që të shqyrtojnë sërish vendimin lidhur me udhëtimet në Kinë

Shtetet e Bashkuara kanë paralajmëruar për rrezikun e udhëtimeve në Kinë, mes një shpërthimi në rritje të koronavirusit dhe masave të diskutueshme për ta parandaluar atë.

Të gjithë personelit jourgjent të konsullatës amerikane dhe familjeve të tyre në Shanghai u është dhënë leja për t’u larguar. Kjo mund të çojë në pezullimin e operacioneve të rregullta në konsullatën e Shangait deri në një njoftimi tjetër.
Kina po përjeton shpërthimin e saj më të keq të koronavirusit që nga fillimi i pandemisë dy vjet më parë.

Ndër qytetet më të goditura nga Covid-19 janë Shangai dhe Shenyang dhe Changchun në veri-lindje të Kinës. Gjithashtu, kufizime të gjera ndaj lëvizjeve janë në fuqi për shkak të politikës së rreptë të Kinës “Zero-Covid”. Gjithsej në të tri qytetet jetojnë 38 milionë banorë.

---