SHBA pezullon vizat për migrantë për 75 vende, përfshirë Kosovën dhe Shqipërinë

Vendimi i fundit nuk prek vizat turistike, biznesore apo vizat tjera, përfshirë edhe për tifozët e futbollit që duan të qëndrojnë në SHBA për të parë nga afër Kupën e Botës që zhvillohet këtë vit

Shtetet e Bashkuara thanë se po pezullojnë trajtimin e vizave për migrantë nga 75 shtete, përfshirë nga Kosova, Shqipëria, Maqedonia e Veriut, Mali i Zi dhe Bosnjë e Hercegovina.

“Departamenti i Shtetit do të pauzojë shqyrtimin e vizave për emigrantë nga 75 shtete, migrantët nga të cilët marrin ndihma sociale nga populli amerikan në nivele të papranueshme. Kjo ndalesë do të jetë në fuqi deri kur SHBA-ja të sigurohet që migrantët e rinj nuk do të përfitojnë nga populli amerikan”, shkroi Departamenti amerikan i Shtetit në X, transmeton albinfo.ch.

Vendimi i fundit nuk prek vizat turistike, biznesore apo vizat tjera, përfshirë edhe për tifozët e futbollit që duan të qëndrojnë në SHBA për të parë nga afër Kupën e Botës që zhvillohet këtë vit, edhe pse administrata Trump ka thënë se do të verifikojë të gjithë aplikuesit e vizave.

Ndërkaq, një zëdhënës i DASH-it tha se administrata e presidentit amerikan, Donald Trump, po i jep fund “abuzimit të sistemit të migrimit” të SHBA-së.

Në mesin e listës të 75 vendeve të publikuara nga Fox Neës, përfshihet edhe Irani dhe Rusia. Zëdhënësja e Shtëpisë së Bardhë e publikoi këtë artikull në X, megjithatë DASH-i ende nuk e ka publikuar listën e këtyre shteteve, transmeton albinfo.ch.

Ndërkaq, një zyrtar amerikan, që foli në kushte anonimiteti për mediat, tha se ky vendim do të hyjë në fuqi nga 21 janari dhe nuk ka një afat se deri kur do të zbatohet.

SHBA-ja që një kohë të gjatë ka refuzuar vizat për personat që duket se mund të kenë nevojë për ndihmë sociale nga Qeveria, por DASH-i ka thënë se tani do të përdorë të njëjtin autoritet për të pezulluar vizat bazuar në nacionalitetin e aplikuesve.

Në fillim të javës, DASH-i tha se kishte revokuar mbi 100.000 viza që kur Trump u rikthye në Shtëpinë e Bardhë vitin e kaluar.

Administrata e Trumpit ka ndërmarrë veprime për të luftuar migrimin e paligjshëm dhe Departamenti për Punë të Brendshme tha muajin e kaluar se administrata amerikane ka dëbuar më shumë se 605.000 persona dhe 2.5 milionë të tjerë janë larguar vullnetarisht.

Vendet që SHBA-ja pezulloi shqyrtimin e vizave për migrimin

Afganistanin, Shqipërinë, Algjerinë, Antigua dhe Barbudën, Armeninë, Azerbajxhanin, Bahamas, Bangladeshin, Barbadosin, Bjellorusinë, Belizën, Butanin, Bosnjë e Hercegovinën, Brazilin, Burmën, Kamboxhian, Kamerunin, Kepin e Gjelbër, Kolumbinë, Bregun e Fildishtë, Kubën, Republikën Demokratike të Kongos, Domenikën, Egjiptin, Eritrean, Etiopinë, Fixhin, Gambinë, Gjeorgjinë, Ganën, Grinlandën, Guatemalën, Guinean, Haitin, Iranin, Irakun, Xhamajkën, Jordaninë, Kazakistanin, Kosovën, Kuvajtin, Kirgizinë, Laosin, Libanin, Liberinë, Libinë, Maqedoninë e Veriut, Marokun, Nepalin, Nikaraguan, Nigerinë, Pakistanin, Republikën e Kongos, Rusinë, Ruandën, Shën Kits dhe Nevisin, Shën Lucinë, Shën Vincentin dhe Gernadinën, Senegalin, Sierra Leonen, Somalinë, Sudanin e Jugut, Sudanin, Sirinë, Tanzaninë, Tajlandën, Togon, Tunizinë, Ugandën, Urugain, Uzbekistanin dhe Jemenin.

---