Shkupi mban paradën e parë Gay më 2013

Organizata maqedonase e të drejtave të homoseksualëve njoftoi se vitin e ardhshëm do ta mbajnë paradën e parë në Shkup.

Organizata – Këshilli i LGBT-ve të Bashkuar – ka zhvilluar një takim, ku ka vendosur të formojë një grup, i cili do të kujdeset për organizimin e paradës së parë të homoseksualëve.

Sipas organizatorëve, parada është caktuar të mbahet në vitin 2013, por ende nuk dihet data e saktë.

Në deklaratë thuhet se të gjitha organizatat relevante dhe institucionet që punojnë për avancimin e të drejtave të njeriut, si ambasadat, agjencitë shtetërore dhe organizata rajonale të komunitetit LGBT (Lesbian, Homoseksual, Biseksual dhe Trans-seksual), ftohen që t’i bashkohen grupit punues.

Një raport vjetor i “Rainbow Evropa Index 2011”, në bashkëpunim me ILGA-Evropë, e vënë Maqedoninë të fundit në Ballkan, kur është fjala për mbrojtjen ligjore të komunitetit LGBT. / Jeta në Kosovë