Shkurtohen pensionet e invaliditetit?

Komisioni për çështje sociale i Dhomës Nacionale të Parlamentit të Zvicrës synon të shkurtojë pensionet e invaliditetit edhe për invalidët që tashmë i shfrytëzojnë këto pensione. Ndryshe nga ky komision kishte vendosur Dhoma e Kantoneve e Parlamentit. Sipas saj, invalidët e deritashëm nuk do të prekeshin.

Ndërsa Këshilli Federal kishte shprehur qëndrimin ngjashëm me atë të komisionit social. Sipas tij, një sistem  ri do të vlente për invalidët e deritashëm me një shkallë invaliditeti prej më shumë se 50 për qind. Ndërsa personat mbi 55 vjeçarë do të kurseheshin nga shkurtimi i pensioneve në fjalë.

Me masat që do të merreshin në këtë variant do të kurseheshin 150 milionë franga në vit. Ndërsa në variantin ku pensionet u shkurtohen edhe shfrytëzuesve të tashëm të pensioneve invalidore, kursimet do të shkonin deri në 300 milionë franga në vit.