Shqipëri: Vonesat në fluturime, kompensohen 800 pasagjerë

Autoriteti i Aviacionit Civil (AAC) bën të ditur se ka arritur në 800 numri i pasagjerëve të kompensuar nga kompanitë ajrore, për shkak të vonesave në fluturime.

Sipas AAC, sa u takon kompensimeve të pasagjerëve, në muajin shkurt numri i tyre u rrit me 100 më shumë krahasuar me muajin janar.

AAC bën të ditur se kompania “Fly Ernest” ka kompensuar 96 pasagjerë, ndërsa “Blue Panorama” ka kryer 500 kompensime. Kurse, “Wizz Air” numëron në total 74 kompensime një muaj më parë, shkruan atsh, përcjell albinfo.ch.

Ndërkohë, AAC raporton se janë në proces edhe 1200 kompensime nga kompanitë ajrore.

AAC mbetet e angazhuar t’i përgjigjet me procedurë kompensimi çdo ankese të qytetareve për vonesat në linjat ajrore, duke përmbushur kështu misionin e saj në shërbim të qytetarëve.