Shqipëria ka humbur rreth 40 për qind të popullsisë për 35 vjet

Sipas raportit, rënia e popullsisë në Shqipëri është nxitur kryesisht nga dy faktorë: fertiliteti i ulët dhe emigracioni i lartë neto. Edhe pse vendi përfitoi nga një rritje e popullsisë në moshë pune deri në vitin 2023, efektet e plakjes tashmë po reflektohen ndjeshëm në ekonomi

Shqipëria ka humbur rreth 40 për qind të popullsisë gjatë tre dekadave e gjysmë tranzicioni, ndërsa emigracioni vijon të mbetet një nga sfidat më të mëdha për zhvillimin ekonomik të vendit. Kjo theksohet në raportin e fundit të Banka EVropiane për Rindërtim dhe Zhvillim (BERZH) për periudhën 2025–2026, me titull “Një botë e vjetër, por më e guximshme”.

Sipas raportit, rënia e popullsisë në Shqipëri është nxitur kryesisht nga dy faktorë: fertiliteti i ulët dhe emigracioni i lartë neto. Edhe pse vendi përfitoi nga një rritje e popullsisë në moshë pune deri në vitin 2023, efektet e plakjes tashmë po reflektohen ndjeshëm në ekonomi.

BERZH vlerëson se kostoja e plakjes së popullsisë arrin në 0.28 pikë përqindje, duke çuar në një rënie prej 0.53 pikë përqindje krahasuar me përfitimet demografike të periudhës 2000–2023. Ky zhvillim po krijon një boshllëk të ndjeshëm, i cili po përkthehet në ngadalësim ekonomik.

Parashikimet për të ardhmen mbeten shqetësuese. Për periudhën 2024–2050, ndikimi negativ i faktorëve demografikë pritet të thellohet në –0.3 deri –0.4 pikë përqindje në vit, duke e renditur Shqipërinë ndër ekonomitë më të ekspozuara në rajonin e BERZH. Edhe pas vitit 2050, tendenca pritet të mbetet negative, duke reflektuar plakjen e vazhdueshme të popullsisë dhe tkurrjen e forcës së punës.

Ekspertët theksojnë se mungesa e fuqisë punëtore, rritja e numrit të të moshuarve dhe dobësimi i bazës së kontribuuesve në skemat sociale po e vendosin ekonominë shqiptare nën presion të vazhdueshëm, transmeton albinfo.ch.

Raporti paralajmëron se, në mungesë të rritjes së produktivitetit, investimeve në teknologji dhe zhvillimit të kapitalit njerëzor, emigracioni masiv do të vazhdojë të frenojë rritjen ekonomike për të paktën edhe tre dekadat e ardhshme.

Një tjetër tregues shqetësues është edhe largimi i trurit: rreth 23 për qind e qytetarëve të arsimuar shqiptarë kanë emigruar, duke dobësuar më tej potencialin zhvillimor të vendit.

Në këtë kontekst, ekspertët kërkojnë politika më të forta për të frenuar emigracionin dhe për të nxitur kthimin e kapitalit njerëzor, si një domosdoshmëri për të garantuar rritje të qëndrueshme ekonomike në të ardhmen.

---