Shqipëria me çmimet më të lira të hoteleve

Pas Shqipërisë renditen menjëherë Moldavia dhe Kosova, ku çmimi për të fjetur një natë llogaritet në 28 funte, ndërsa në Serbi 30 funte

foto ilustrim

Sipas një renditje të përpiluar nga “Airbnb”, platforma më e madhe “online” për shërbimet e akomodimit, Shqipëria është në vendin e dytë në Evropë me çmimet më të lira të hoteleve, bëjnë të ditura mediat shqiptare.

Në Shqipëri një natë qëndrimi në hotel kushton mesatarisht 27 funte. Çmim më të lirë se ky, në Evropë ka vetëm Maqedonia, ku një natë në hotel kushton 26 funte, përcjell albinfo.ch.

Sipas kësaj renditjeje, thuajse të gjitha vendet me hotelet më të lira gjenden në Evropën Lindore. Pas Shqipërisë renditen menjëherë Moldavia dhe Kosova, ku çmimi për të fjetur një natë llogaritet në 28 funte, ndërsa në Serbi 30 funte.

Në Evropën Perëndimore çmimet janë dy deri në tri herë më të larta. Sipas renditjes, vendi më i shtrenjtë është Islanda, ku një natë në hotel paguhet 112 funte, ndërkohë që në shumicën e vendeve të tjera çmimi varion nga 50 deri në 85 funte.

Siç shprehen agjencitë turistike, edhe pse ka avantazhe në kosto, turizmi në Shqipëri vuan infrastrukturën e dobët, por edhe shërbimet.