Shumica e plazheve në Evropë kanë cilësi të shkëlqyer të ujit

Një raport i ri i Agjencisë Evropiane të Mjedisit tregon se më shumë se 85% e zonave të monitoruara për not në Evropë kanë ujë me cilësi “të shkëlqyer”

Përpara sezonit veror, Agjencia Evropiane e Mjedisit (EEA) ka publikuar raportin e saj më të fundit për cilësinë e ujërave për not, duke konstatuar se shumica dërrmuese e plazheve, liqeneve dhe zonave të tjera të monitoruara në Evropë ofrojnë kushte shumë të mira për pushuesit.

Mbi 85% e më shumë se 22 mijë pikave të monitoruara janë klasifikuar me cilësi “të shkëlqyer” të ujit, transmeton albinfo.ch.

Shtetet me rezultatet më të mira janë Qiproja, Bullgaria, Greqia, Austria dhe Kroacia, ku të paktën 95% e vendeve të monitoruara kanë marrë vlerësimin më të lartë.

Raporti përfshin të dhëna nga 27 vendet e Bashkimit Evropian, si dhe nga Zvicra dhe Shqipëria. Sipas analizës, rreth 96% e të gjitha zonave të monitoruara përmbushin të paktën standardet minimale të cilësisë së ujit për not.

Ekspertët theksojnë se ujërat bregdetare zakonisht kanë cilësi më të mirë sesa liqenet dhe lumenjtë. Rreth 89% e plazheve bregdetare janë vlerësuar si “të shkëlqyera”, krahasuar me 78% të zonave të brendshme ujore. Kjo lidhet me aftësinë më të madhe të detit për vetëpastrim dhe qarkullim të ujit.

Vetëm 1.5% e vendeve të monitoruara rezultuan me cilësi të dobët të ujit. Në rastet kur një zonë regjistron cilësi të dobët për pesë vite radhazi, autoritetet janë të detyruara të ndalojnë notin deri në përmirësimin e situatës.

Raporti konsiderohet një tregues i rëndësishëm për turistët dhe pushuesit që planifikojnë pushimet verore, pasi cilësia e ujit është një nga faktorët kryesorë për sigurinë dhe shëndetin gjatë notit.

---