Si do të preken banorët nga rregullat e reja të Austrisë për çmimet e energjisë elektrike?

(KEYSTONE/Christian Beutler)

Austria do të pësojë ndryshime të rëndësishme në qasjen e saj ndaj çmimeve të energjisë elektrike, me qeverinë që njoftoi një reduktim të subvencioneve dhe zgjerimin e masave kryesore të tregut.

Ministri i Financave, Magnus Brunner dhe ministrja e Energjisë, Leonore Gewessler, përshkruan reformat e energjisë të mërkurën, duke theksuar nevojën për rritjen e konkurrencës në treg dhe një qasje më të qëndrueshme ndaj subvencioneve, transmeton albinfo.at.

Këtu është një përmbledhje se si këto rregulla të reja do të ndikojnë te banorët në mbarë vendin, sipas thelocal.at.

Ulja e subvencionit

Duke filluar nga 1 korriku, subvencioni për 2900 kilovatë orë (kWh) të para të energjisë elektrike për familje në vit do të reduktohet nga maksimumi 30 në 15 centë për kWh. Kufiri i sipërm i çmimit të energjisë, deri në të cilin zbatohet frena, do të ulet gjithashtu nga 40 në 25 centë.

Pavarësisht këtyre ndryshimeve, 2900 kWh fillestare do të subvencionohen deri në fund të vitit.

Sipas rregullores së re, familjet do të paguajnë vetëm dhjetë centë për kWh për 2900 kWh të para, që përbën afërsisht 80 për qind të konsumit mesatar të energjisë elektrike. Për më tepër, familjet me më shumë se tre persona do të marrin një subvencion prej 52,50 € për person në vit dhe familjet me të ardhura të ulëta do të përfitojnë nga një ulje prej 75 për qind në kostot e rrjetit.

Gewessler theksoi se këto masa synojnë të nxisin ofruesit e energjisë elektrike për të ulur çmimet dhe për të nxitur konkurrencën në tarifat e shitjes me pakicë.

Zgjerimi i masave të tregut

Taksa e fitimeve të papritura për kompanitë e energjisë do të zgjatet deri në fund të vitit 2024, me rregullime për të përshpejtuar rritjen e prodhimit të energjisë elektrike të gjelbër.

Kompanitë që investojnë në energjitë e rinovueshme këtë vit ose në tre vitet e ardhshme tani mund të zbresin 75 për qind të kostove, duke dyfishuar shumën e zbritshme. Kompanitë e karburanteve fosile do të përballen me një taksë prej 40 për qind mbi fitimet që tejkalojnë pesë për qind të mesatares së tyre për vitet 2018-2021.

Vendimet e qeverisë kanë marrë reagime të ndryshme nga aktorë të ndryshëm politikë dhe të industrisë. Ndërsa FPÖ kritikon frenimin e çmimit të energjisë elektrike dhe taksën e fitimit, duke kërkuar një ulje të akcizës për energjinë, NEOS e konsideron frenimin e çmimit të energjisë elektrike si “të pakuptimtë” edhe në gjysmën e nivelit.

SPÖ favorizon një kufi të çmimit të energjisë të ngjashme me Gjermaninë, dhe ÖGB dhe Dhoma e Punës shprehin shqetësime për kohën e uljes së kufirit të kostos së energjisë elektrike.