Sipas Kohës: LVV fiton në tri komuna kryesore

Foto: Facebook

Lëvizja Vetëvendosje ka fituar në tri nga katër komunat më të mëdha që kanë hyrë në balotazh të dielën, sipas projeksionit të KOHËS. Ky projeksion e ka nxjerrë fituese partinë e Albin Kurtit në Prishtinë, Prizren e Gjilan. Humbjen e vetme në komunat e mëdha në këtë rund, Vetëvendosje e pati në Gjakovë ku fitoi sërish Ardian Gjini.

Megjithatë, në tri komunat ku ka fituar Vetëvendosje, rezultati është brenda margjinës së gabimit prej 3 pikë të përqindjes, përcjell albinfo.ch.

Në rundin e parë, kjo parti s’fitoi mbi 50 për qind në asnjë komunë të vendit.

Vitia fiton ngushtë në Prishtinë

Rezultat tejet i ngushtë pritet të dalë nga balotazhi në Prishtinë. Arben Vitia i Lëvizjes Vetëvendosje, sipas projeksionit të KOHËS, do të jetë kryetar i ri i Prishtinës. Në rundin e dytë të zgjedhjeve, ai ka marrë 52.4 për qind të votave. Rivali i tij, Përparim Rama, i Lidhjes Demokratike të Kosovës, ka marrë 47.6 për qind të votave.

Haskuka mbetet kryetar i Prizrenit

Mytaher Haskuka i Lëvizjes Vetëvendosje do të jetë kryetar i Komunës së Prizrenit edhe për një mandat, sipas projeksionit të KOHËS për balotazhin e së dielës. Haskuka ka fituar shumë ngushtë përballë Shaqir Totajt të Partisë Demokratike të Kosovës.

Në balotazh, Haskuka ka marrë 51 për qind të votave, kundrejt 49 për qind që i ka marrë Totaj.

Hyseni rrëzon Hazirin nga pushteti në Gjilan

Lutfi Haziri nuk do të jetë më kryetar i Komunës së Gjilanit, sipas projeksionit të KOHËS për balotazhin në këtë komunë, të mbajtur të dielën. Atë e ka rrëzuar nga pushteti Alban Hyseni i Lëvizjes Vetëvendosje.

Hyseni ka marrë 50.9 për qind të votave, ndërsa Haziri bie nga pushteti me 49.1 për qind të votave.

AAK-ja mban Gjakovën

Aleanca për Ardhmërinë e Kosovës ka fituar edhe një mandat në Komunën e Gjakovës, sipas projeksionit të KOHËS. Ardian Gjini do të jetë kryetar edhe për katër vjet pasi ka marrë shumicën në rundin e balotazhit ndaj rivales Mimoza Kusari-Lila së Lëvizjes Vetëvendosjes. Gjini ka fituar 55.2 për qind të votave, ndërsa Kusari-Lila 44.8 për qind të votave.