Strasburgu hedh poshtë ankesat për minaretë

Në Gjykatën për të drejtat e njeriut Strasburg duhet të drejtohet vetëm pasi të kenë shteruar të gjitha mundësitë ligjore në Zvicër

Gjykata Evropiane e të drejtave të njeriut në Strasburg ka hedhur poshtë dy ankesa në lidhje me ndalimin e ndërtimit të minareve në Zvicër. Por, kjo gjykatë nuk ka shprehur mendim nëse ndalesa që ka bërë Zvicra për minaret është shkelje e konventës së të drejtave të njeriut ose jo.

Ajo vetëm ka sjellë vendimin se dy ankesat e drejtuara asaj për nenet e reja të kushtetutës zvicerane (që shpallin të ndaluar ndërtimin e minareve) nuk plotësojnë kushtet për ankesë në këtë gjykatë. Kjo, për shkakun se të ankuarit nuk kanë mundur të dëshmojnë se janë viktima të ndalimit të minareve.

Ky vendim nënkupton që ankesa në Strasburg duhet të drejtohet vetëm pasi të kenë shteruar të gjitha mundësitë ligjore në Zvicër. Që dmth. kur personave të caktuar, të gjitha instancat zvicerane ua ndalojnë me vendim kërkesën për ndërtimin e një minareje.