Suedia ka nevojë për 64 mijë punëtorë të huaj në vit

Agjencia Suedeze e Punësimit tha se vendi skandinav këtë vit ka nevojë për 64 mijë emigrantë për të parandaluar një rënie të rritjes ekonomike të shkaktuar nga mungesa e fuqisë punëtore të kualifikuar.

Drejtori i Përgjithshëm i Agjencisë, Michael Sjober, në një deklaratë në televizionin shtetëror “SVT” tha se mungesa e fuqisë punëtore të kualifikuar në vitin e ardhshëm mund të dëmtojë në mënyrë të konsiderueshme Suedinë, përcjell albinfo.ch.

Nga zyra e punësimit përmendin se për shkak të mungesës së popullsisë të aftë të vendit, kërkohet një numër në rritje i punëtorëve të huaj.

“Norma e lindjeve në Suedi është shumë e ulët. Popullsia vendëse është në rënie. Në mënyrë që të vazhdojë me rritjen e mëtejshme, kërkohet punë, e në këtë mënyrë një popullsi më e madhe”, thotë Johan Bishman nga Agjencia e Punësimit.

Ai shtoi se disa kompani kanë ndier tashmë mungesën e punëtorëve, duke theksuar se ky problem do të vazhdojë të rritet vitin e ardhshëm.

“Mungesa e fuqisë punëtore tashmë do të ndikojë në sektorin publik dhe vitin e ardhshëm pasojat do të ndihen më shumë te sipërmarrësit. Një numër i kompanive private janë të prekura nga ky problem dhe kjo do të vazhdojë të rritet vitin e ardhshëm”, ka thënë Bishman.

Sipas Agjencisë për Punësim të Suedisë, duke reduktuar numrin e njerëzve që kanë lënë shkollën e mesme para diplomimit dhe kanë mbërritur moshën e pensionit, janë mënyrat që mund të lehtësojnë situatën, por thonë se zgjidhja afatgjatë është e nevojshme të kërkohet te emigracioni.

Sipas Agjencisë së Punësimit të Suedisë, një numër në rritje i vendeve të punës në këtë vend kanë marrë njerëz të cilët nuk kanë lindur në këtë vend. Ai tha se arsyeja kryesore për këtë është se vazhdimisht zvogëlohet numri i suedezëve që janë të aftë për punë dhe kompanitë suedeze punësojnë më shumë të huaj.