Lajme

Suedia ndalon përdorimin e celularëve në shkolla nga viti 2026

E mërkurë, 17 Shtator 2025 - 22:30 albinfo.ch

(KEYSTONE/Christian Beutler)

Duke filluar nga vjeshta e vitit 2026, të gjitha shkollat në Suedi do të jenë të detyruara të mbledhin telefonat celularë të nxënësve në fillim të ditës dhe t’i mbajnë deri në fund të saj, sipas një raportimi të “The Guardian”.

Ky vendim është pjesë e një strategjie të re për të përmirësuar sigurinë dhe përqendrimin në mësim, duke eliminuar shpërqendrimet teknologjike gjatë orëve të shkollës.

Reforma më e madhe arsimore në dekada

Ministrja suedeze e Arsimit dhe Shkollave, Simona Mohamsson, e quajti këtë masë si pjesë të një “investimi historik buxhetor” dhe pjesë të reformës më të thellë në arsimin suedez të 30 viteve të fundit.

Në projektbuxhetin që do të paraqitet javën e ardhshme, qeveria suedeze ka parashikuar 95 milionë korona për vitin 2026 dhe 100 milionë për vitin 2027, për të ndihmuar shkollat në zbatimin e rregullit të ri, përcjell albinfo.ch.

Zbatimi do të jetë i detyrueshëm për të gjitha shkollat

Rregullorja do të vlejë për të gjithë nxënësit e moshave 7 deri në 16 vjeç dhe do të zbatohet në mënyrë të unifikuar në të gjitha shkollat e vendit. “Nuk është çështje zgjedhjeje. Ky rregull do të vlejë për çdo të ri në Suedi, në çdo klasë, në çdo shkollë,” deklaroi Mohamsson, njëkohësisht kryetare e Partisë Liberale.

Megjithëse shumë shkolla në Suedi tashmë mbledhin telefonat që në mëngjes, nxënësit shpesh kanë gjetur mënyra për të anashkaluar rregullin, si për shembull duke dorëzuar një pajisje të vjetër ose duke pretenduar se e kanë harruar ose se u është prishur telefoni.

Suedia nuk është i vetmi shtet që po ndërmerr masa të tilla:

Danimarka ka njoftuar se do të ndalojë celularët në shkolla, duke rekomanduar gjithashtu që fëmijët nën 13 vjeç të mos kenë telefon apo tablet personal.

Norvegjia vendosi një moshë minimale prej 15 vjeç për përdorimin e rrjeteve sociale, duke kritikuar kompanitë teknologjike se po ndikojnë në zhvillimin mendor të fëmijëve.

Franca ka përforcuar ndalimin e celularëve në shkolla të mesme që prej shtatorit të vitit të kaluar.