Swiss, me rekord të ri të numrit të pasagjerëve 

Gjithsej gjatë korrikut shërbimet e kësaj kompanie i kanë shfrytëzuar 1 milion e 66 mijë veta. Ky numër ia kalon rekordit të deritashëm, të arritur në korrikun e vitit 2016, për 0.7 për qind

Foto ilustrim

Kompania Ajrore e Zvicrës Swiss në muajin korrik ka vendosur një rekord të ri mujor të numrit të pasagjerëve. Gjithsej gjatë korrikut shërbimet e kësaj kompanie i kanë shfrytëzuar 1 milion e 66 mijë veta, njofton sda.ch. Ky numër ia kalon rekordit të deritashëm, të arritur në korrikun e vitit 2016, për 0.7 për qind.

Swiss që është kompani partnere e Lufthansa-s gjermane njofton me këtë rast se rekordin e ka arritur duke reduktuar numrin e fluturimeve për 5.1 për qind në krahasim me korrikun e vitit të kaluar, transmeton albinfo.ch. Këtë sukses e ka arritur falë aeroplanëve më të mëdhenj dhe shfrytëzimit më të mirë të tyre.

Edhe në krahasime më afatgjata, numri i pasagjerëve ka shënuar rritje të dukshme. Kështu, vetëm në këta shtatë muaj të vitit, me Swiss kanë fluturuar 9.7 milionë pasagjerë që është më shumë se gjatë gjithë vitit 2005, kur kishin qenë 9.6 milionë. Njëherësh shifra në fjalë është për 3-7 për qind më e madhe se në shtatë muajt e vitit 2016