Taksë 100%, për të gjitha mallrat nga Serbia

Ka hyrë në fuqi vendimi i Qeverisë së Kosovës për zgjerimin e produkteve ndaj të cilave do të aplikohet taksa 100 për qind. 

Qeveria mori këtë vendim më 28 dhjetor, ndërsa patën njoftuar se ky vendim hyn në fuqi më 1 janar.

Në këtë listë janë shtuar edhe produktet me origjinë ndërkombëtare, të cilat vijnë në Kosovë përmes Serbisë. 

Sipas ministrit të Tregtisë, Endrit Shala, mallrat nuk do të mund të hyjnë pa iu nënshtruar taksës 100 për qind, pavarësisht vendit të origjinës. 

Brendet që do t’i nënshtrohen taksës 100 % në bazë të vendimit janë Coca Cola,  Ytong-blloka, Rouch-Bravo, Henkel-Persil, Dukat, Tuborg, Gorenje, Meggle, Jaffa etj.