Të dielën zgjedhjet në balotazh në Maqedoninë e Veriut

Zgjedhësit në Maqedoninë e Veriut do të rikthehen në qendrat e votimit të dielën, për të vendosur se kush do të jetë presidenti i tyre i ardhshëm.

Nga mesnata fillon heshtja zgjedhore për rundin e dytë, që ka vendosur përballë njëri-tjetrit kandidatin properëndimor, Stevo Pendarovski dhe rivalen Gordana Siljanovska Davkova, që u renditën të parët të rundin e parë. Të dy kandidatët patën një diferencë të vogël votash, me Pendarovskin që mori 42.8 për qind të votave, ndërsa kandidatja e VMRO-DPMNE me 42.2 për qind.

Në rundin e parë, marrëveshja e Prespës me Greqinë, që e shndërroi ish-Republikën Jugosllave të Maqedonisë në Maqedoninë e Veriut, ishte tema kryesore. Ndryshimi i emrit ka ringjallur aspiratat evropiane, ndërsa nacionalistët thonë se vendit i është cenuar dinjiteti.

Roli i presidentit në Maqedoninë e Veriut është kryesisht ceremonial. Ai apo ajo është komandant suprem i forcave të armatosura dhe nënshkruan legjislacionin parlamentar.