Test i detyruar për të huajt që dëbohen nga Zvicra

Shumë shtete dhe kompani ajrore pranojnë njerëzit e dëbuar nga Zvicra vetëm nëse rezultojnë negativë, ka argumentuar ministrja e drejtësisë Karin Keller-Sutter

Për të huajt që duhet të largohen nga Zvicra, autoritetet në të ardhmen duhet të sigurojnë mundësinë që ata të detyrohen të bëjnë testin Covid.

Kjo është vendosur sot nga deputetët e Dhomës Nacionale të Parlamentit të Zvicrës, shkruan srf.ch.

Me këtë rast vendimi është marrë pa votat e të majtës  (Partisë Socialdemokrate) dhe të Gjelbërve, transmeton albinfo.ch.

Këto dy parti kanë kritikuar qëndrimin në fjalë duke thënë se kjo është një ndërhyrje disproporcionale në integritetin fizik të të huajve që dëbohen.

Por, shumë shtete dhe kompani ajrore pranojnë njerëzit e dëbuar nga Zvicra vetëm nëse rezultojnë negativë, ka argumentuar ministrja e drejtësisë Karin Keller-Sutter, resori i së cilës mbulon këtë problematikë.

Por, nga ana tjetër shumë nga personat që dëbohen pritet se do të refuzojnë t`i nënshtrohen testimit.

Pas votimit në Dhomën Nacionale, tani është radha e votimit të kësaj çështjeje në Dhomën e Kantoneve (senat).

---