Lajme

Thaçi: Do të lëvizim në marrëveshje të reja me Serbinë

Presidenti i Kosovës, Hashim Thaçi, ka folur pas takimit me të dërguarin e posaçëm të presidentit Donald Trump për bisedimet Kosovë – Serbi, Richard Grenell.

Ai ka thënë se ishte një takim efektiv, duke shtuar se do të lëvizin në marrëveshje të reja pas arritjes së marrëveshjes për linjën ajrore Prishtinë-Beograd.

“Ishte një takim jashtëzakonisht efektiv, ne do të lëvizim në marrëveshje të reja pas arritjes së marrëveshjes së linjës Prishtinë-Beograd. Do të kemi angazhime tjera për linjën hekurudhore. Do të punojmë si institucione që të arrijmë marrëveshjen finale si dy vende të pavarura. Është fakt që kemi një dinamik të mbështetur nga SHBA dhe po ndodhin gjëra të cilat dy dekada më herët nuk janë menduar. Aspirata e Kosovës është të jetë pjesë e organizatës së NATO-s”, ka thënë ai, transmeton Koha.net.

Ai ka thënë se Kosova do të marrë veprimet e veta të përgjegjshme gjatë ditëve dhe javëve të ardhshme.

Sipas tij, Kosova do të ndërmarrë veprime që e lehtësojnë dialogun.

“Kosova do të lëvizë drejt një perspektive të sigurt dhe hapa të sigurt që të jemi pjesë e NATO-s dhe Bashkimit Evropian”, ka thënë ai.

Thaçi ka thënë se shpreson që BE-ja është në mbështetje të plotë të një procesi dinamik në negociatat me Serbinë.

Ai ka thënë se Kosova është e zhgënjyer dhe e tradhtuar nga Bashkimi Evropian, duke shtuar se janë përmbushur të gjitha kriteret për liberalizim vizash, përcjell Albinfo.ch