Tifozët e ‘Cërvena Zvezdes’ nderojnë terroristët e vrarë në veri të Kosovës

Ultrasit e skuadrës nga Beogradi, që njihen edhe si grupim nacionalist, ngritën pankarta me emrat e terroristëve të vrarë, gjatë sulmit të armatosur të organizuar, më 24 shtator. Aty ishin shkruar emrat e Igor Milenkoviq dhe Bojan Mijailoviq.

Ata shpalosën edhe një fotografi të madhe të terroristit të tretë, Stefan Nedeljkovic, i cili gjithashtu mbeti i vrarë pranë manastirit të Banjskës.

Gjatë ndeshjes kishte edhe thirrje të shumta antishqiptare. Mes këngëve të serbëve ishin “vrite, prite, që shqiptari të mos ekzistojë” si retorika “Kosova është Serbi”, transmeton a2 përcjell albinfo.ch.

Edhe pse nuk lejon thirrjet apo ofendimet me bazë nacionaliste dhe raciste, edhe në këtë rast, UEFA nuk ndërmori asnjë masë për të kërkuar heqjen e banerave me natyrë politike dhe etnike. Konfederata europiane e futbollit vijon të mbyllë një sy dhe t’i tolerojë këto shfaqje, që nxisin urrejtje dhe dhunë.