Tiranë: Falja e Fitër Bajramit në Sheshin “Skënderbej”, mijëra besimtarë bashkohen në lutje

Mijëra besimtarë myslimanë u mblodhën sot në sheshin “Skënderbej” në Tiranë për të kryer faljen e madhe të Fitër Bajramit, duke shënuar përfundimin e muajit të shenjtë të Ramazanit.

Ceremonia filloi në orën 06:45 me leximin e Kuranit dhe një ligjëratë, për të vijuar më pas me faljen e namazit të Bajramit.

Kreu i Komunitetit Mysliman të Shqipërisë (KMSH), në fjalën e tij para besimtarëve, uroi që Zoti t’u kishte pranuar agjërimin dhe t’i ndihmonte në përballimin e sfidave të jetës. “Kjo ditë sot na gjen me zemra të mbushura dhe sakrifica jonë është pranuar. Jetojmë në një epokë ku vlerat e familjes po lëkunden dhe njeriu matet me atë që ka. Kjo ditë është një urë mes asaj që kemi mësuar në Ramazan dhe asaj që do të bëjmë pas tij. Bajrami na kujton unitetin, mëshirën dhe drejtësinë. Ne jemi një komb”, u shpreh Bujar Spahiu, përcjell albinfo.ch.

Ai theksoi rëndësinë e ndihmës për ata në nevojë, duke theksuar se kjo festë është edhe një moment për të ndarë gëzimin me të varfërit, të moshuarit dhe të sëmurët.

Pritjet tradicionale me rastin e Fitër Bajramit po organizohen në selinë e KMSH-së, nga ora 09:00 deri në orën 12:00, ku besimtarë, personalitete dhe përfaqësues të institucioneve po ndajnë urime për këtë ditë të shenjtë, përcjell albinfo.ch.