Lajme

Trump votoi në Florida

Mediat e huaja raportojnë se Trump ka votuar herët në mëngjes në Florida, në një bibliotekë që ishte kthyer në qendër votimi, por nuk u pa i shoqëruar nga gruaja e tij, Melanie Trump.

Trump ka një shtëpi në Florida dhe e kaloi vendbanimin e tij atje vitin e kaluar nga vendlindja e tij, që ishte New York-u.

“Unë votova për një djalë me emrin Trump”, tha ai me një buzëqeshje, ndërsa doli para medieve. Teksa votonte, ai mbajti një maskë, e cila është e rrallë për presidentin, i cili kaloi edhe infeksionin COVID.

“Ishte një votim shumë i sigurt. Shumë më i sigurt sesa kur dërgoni një fletë votimi me postë, unë mund t’ju them pse. Çdo gjë ishte perfekte, shumë e rreptë, e drejtë nga rregullat. Kur dërgoni fletën tuaj të votimit me postë, kurrë nuk mund të jetë e sigurt”, tha Trump.

Pothuajse 55 milionë amerikanë tani kanë hedhur vota të parakohshme, pasi koronavirusi e ka bërë votimin personal më problematik.

Më 2016 ai fitoi ndaj Hillary Clinton, kurse kësaj radhe përballë do të ketë një figurë të njohur të politikës amerikane, ish-zv. presidentin Joe Biden.

Gjithsesi ai votimin e sotëm personalisht e ka konsideruar përmes një shënimi në Twitter: “Një nder i madh”.