Ulje e papunësisë: Zvicra ka 5 milionë e 15 mijë të punësuar

Ka rënie të papunësisë por megjithatë, shkalla e saj te të huajt është afër 8 për qind, që është dukshëm mbi atë të zviceranëve

Në tremujorin e dytë të këtij viti në Zvicër kanë qenë të papunë 213 mijë veta, që është për 9000 më pak se në periudhën e njëjtë të një viti më parë. Por në të njëjtën kohë është rritur numri i personave nga mosha 50 deri 64 vjeçare që nuk kanë pasur vende pune, njofton Zyra Federale për Statistikë.

Shkalla e papunësisë gjatë kësaj periudhe është ulur si te shtetasit zviceranë ashtu dhe te ata të huaj, shkruan srf.ch. Por megjithatë, shkalla e papunësisë te të huajt që jetojnë në Zvicër është afër 8 për qind, që është dukshëm mbi atë të zviceranëve, transmeton albinfo.ch.

Gjithsej në Zvicër punojnë 5 milionë e 15 mijë persona, që është për 1.3 për qind më shumë se në tremujorin e dytë të vitit të kaluar.