Ushtarët e FSK-së krijojnë portretin e Adem Jasharit

Me afrimin e ditës së Epopesë së UÇK-së ushtarët kanë nderuar komandantin legjendar Adem Jasharin. 820 ushtarë të Forcës së Sigurisë së Kosovës në kazermën që mbanë emrin e tij kanë formuar portretin e komandantit Adem Jashari.

Ministri e Mbrojtjes ka njoftuar që portreti zuri vend në poligonin e kazermës. “Në vigjilje të Epopesë së UÇK-së dhe 5 Marsit- Ditës së Kazermës ” Adem Jashari”, 820 ushtarë të FSK-së, në poligonin e kazermës, realizuan portretin e Komandantit Legjendar, Adem Jashari, ideuar nga artisti ynë, piktori i njohur Besart Gashi dhe realizuar nga nënoficeri ynë, Vesel Raci”, thuhet në njoftimin e ministrisë.

Ushtarët kanë edhe një mesazh që përçuan me portretin që realizuan.

Marshojmë pas teje Komandant,

Të pandalshëm,

Të pathyeshëm,

Triumfues

Përjetësisht,

Dje, sot, nesër,

Në shpirt- fryma juaj,

Në trup- forca juaj,

Në mendje- vizioni juaj.

Përjetësisht,

Adem Jashari,

Emblema dhe Flamuri ynë!

 

Me 5,6 dhe 7 shënohet Epopeja e Ushtrisë Çlirimtare të Kosovës, për nder edhe të rënies së familjes Jashari.

---