Valais ofron udhëtime falas me tren për turistët

Nisma e re synon të promovojë turizmin lokal dhe përdorimin e transportit publik në vend të makinave.

Autoritetet turistike në kantonin Valais kanë nisur një iniciativë të re për të nxitur turizmin vendas, duke ofruar udhëtime falas me tren për vizitorët që qëndrojnë në hotele në këtë rajon, përcjell albinfo.ch.

Në bashkëpunim me SwissPass Alliance, është prezantuar bileta e re e quajtur “Mobility Ticket”, e cila u mundëson banorëve të Zvicrës që rezervojnë qëndrime në hotelet e Valais të përfitojnë një biletë vajtje-ardhje në transportin publik.

Kjo nismë synon të promovojë turizëm më të qëndrueshëm, duke inkurajuar vizitorët që për udhëtimet e tyre të kohës së lirë të zgjedhin trenin në vend të makinës. Gjithashtu, projekti synon të rrisë rezervimet direkte në hotele dhe të nxisë qëndrime më të gjata të turistëve në rajon.

Projekti pilot po realizohet në bashkëpunim me disa partnerë nga sektori i turizmit dhe transportit publik, me mbështetjen e programit federal Innotour.

Rezultatet e këtij projekti do të analizohen për të vlerësuar ndikimin e masës dhe për të shqyrtuar mundësinë e zgjerimit të saj në të ardhmen.

---