Vendimi për 2 milionë euro për fluturimet e mërgatës ngjall reagime të ashpra politike dhe publike

Opozita, ekonomistë dhe përfaqësues të shoqërisë civile e cilësojnë subvencionimin e linjave ajrore si veprim me prapavijë elektorale në prag të zgjedhjeve të 7 qershorit

Vendimi i Qeverisë në detyrë të Kosovo për ndarjen e 2 milionë eurove për mbështetjen e linjave ajrore që shërbejnë për mërgatën ka nxitur reagime të shumta politike dhe publike, vetëm pak javë para zgjedhjeve të parakohshme të 7 qershorit, transmeton albinfo.ch. 

Qeveria njoftoi se mjetet janë ndarë në kuadër të masës 4.5 “Mbështetja e Mërgatës” të Pakos së Ringjalljes Ekonomike, me arsyetimin se synojnë lehtësimin e fluturimeve për destinacionet që frekuentohen nga diaspora kosovare.

Megjithatë, reagimet më të forta kanë ardhur nga opozita, shoqëria civile dhe njohës të ekonomisë, të cilët e kanë cilësuar këtë vendim si përdorim të parasë publike për përfitime elektorale.

Deputetja e Lidhja Demokratike e Kosovës, Hykmete Bajrami, e quajti vendimin “të turpshëm dhe të papranueshëm”, duke e cilësuar si “keqpërdorim klasik të buxhetit në kohë zgjedhjesh”.

Sipas saj, Qeveria po përdor fondet publike për të ndikuar tek vota e diasporës.

“100-she, 500-she, subvencione e bileta – krejt këto jo pse Kurti brengoset për ju, po sepse keni me votu me 7 qershor”, ka shkruar Bajrami në Facebook.

Edhe ekonomisti Fidan Qerimi ka shprehur shqetësim për mënyrën e ndarjes së mjeteve, duke vlerësuar se vendimi nuk është në harmoni me planifikimet buxhetore për vitin 2026 dhe mund të prodhojë pasoja ekonomike, përfshirë rritjen e inflacionit.

Kritik ndaj këtij vendimi është shprehur edhe Eugen Cakolli nga Kosovo Democratic Institute, i cili e cilësoi subvencionimin e fluturimeve si “qershia mbi tortë në keqpërdorimin e resurseve publike për qëllime puro elektorale”.

Sipas tij, një praktikë e tillë cenon seriozisht parimin e zgjedhjeve të ndershme dhe krijon epërsi të padrejtë për partinë në pushtet përmes përdorimit të institucioneve dhe buxhetit shtetëror.

Reagime ka pasur edhe nga Partia Demokratike e Kosovës. Deputeti Përparim Gruda i bëri thirrje Prokurorisë që të nisë hetime lidhur me këtë vendim.

“Kur pushteti përdor buxhetin e Kosovës për fushatë, zgjedhjet nuk janë më as të lira dhe as të ndershme”, ka deklaruar Gruda.

Ndërkohë, analisti politik Ilir Deda tha se vendimi “e mbivendos partinë ndaj shtetit”, duke shtuar se veprime të tilla tregojnë se institucionet po përdoren në funksion të interesave partiake në prag të zgjedhjeve.

Vendimi i Qeverisë vjen në një periudhë të ndjeshme politike, ndërsa debati për përdorimin e fondeve publike gjatë fushatës zgjedhore pritet të vazhdojë edhe në ditët në vijim./Albinfo.ch 

---