Veseli: Do t’i ndryshoj prioritetet e Qeverisë për më shumë mundësi të rinjve

Lideri i PDK-së ka thënë se luftimi i korrupsionit, forcimi i ekonomisë, është shpresa për të rinjtë në Kosovë

Kadri Veseli kishte zgjedhur vendlindjen e tij, Mitrovicën, për ta hapur fushatën parazgjedhore.

Kandidati i PDK-së për kryeministër ka thënë se do t’i japë rinisë mundësi, ashtu siç ka bërë në partinë e tij, duke promovuar ministra të rinj.

“Ta përmirësojmë sistemin e arsimit, t’i mbështesim më shumë sipërmarrësit e rinj, të investojmë në kompani të suksesshme dhe të mos i ngarkojmë ato me taksa, ta ndalim nepotizmin dhe t’i punësojmë më të mirët, t’u besojmë të rinjve dhe t’ua japim atyre një mundësi të vërtetë për të pasur sukses. Ne jemi e vetmja parti që do ta bëjmë këtë. Unë kam edhe guximin, edhe vendosmërinë, edhe planin e duhur për ta bërë këtë”.

“Do të sjellim investitorë të huaj, që do të krijojnë vende pune. Kosova duhet ta bëjë një zgjedhje: me Shtetet e Bashkuara të Amerikës, në krahun tonë, duke ruajtur interesat tona, të shkojmë drejt anëtarësimit në OKB dhe njohjes ndërkombëtare. Si aleatë, do të marshojmë së bashku, drejt një të ardhme më të mirë”.

Lideri i PDK-së ka thënë se luftimi i korrupsionit, forcimi i ekonomisë, shpresa për të rinjtë në Kosovë, ndërtimi i së ardhmes, të gjitha këto mund të bëhen. Por, sipas tij, së bashku me Shtetet e Bashkuara të Amerikës do të jetë më lehtë dhe më mirë.

---