VMRO-ja kërkon qeveri teknike

Partia më e madhe opozitare në Maqedoni, VMRO-DPMNE, ka vendosur të mos e njohë rezultatin e referendumit.

Kjo parti në mbledhjen e Komitetit Qendror dhe Ekzekutiv që ka mbajtur ka dalë me qëndrimin që të formohet qeveri teknike, përcjell albinfo.ch.

“Është e nevojshme që menjëherë të respektohet Marrëveshja dhe Ligji për zgjedhjet, ku do të formohet një qeveri teknike sipas “Marrëveshjes së Përzhinës”, me një mandat prej 100 ditësh. Kjo do të thotë dorëheqjet e Zaevit, Spasovskit dhe Carovskës dhe ministrat për Punë të Brendshme dhe për Punë dhe Politikë Sociale t’i takojnë VMRO-DPMNE-së, në afat prej 100 ditësh. Vetëm kjo është parakusht për zgjedhje të lira dhe demokratike”, ka thënë deputeti i VMRO-DPMNE-s, Aleksandar Nikollovski.

Lidhur me ndryshimet kushtetuese, VMRO-ja vazhdon të besojë se deputetët mbajnë qëndrimin e partisë dhe nuk do të ndryshojnë mendje.