Xhaka shënon golin e tij të parë në bundesligë

Ndërsa Shaqiri ka luajtur për herë të parë në njëmbëdhjetëshen e parë për FC Bajernin kundër Mainz 05

Dy „bundesligasit” e rinj shqiptarozviceranë, Xhaka dhe Shaqiri kanë treguar sukses në ndeshjet e radhës të bundesligës gjermane. Kështu, Granit Xhaka ka shënuar golin e tij të parë për ekipin e Borussia Mönchengladbach në ndeshjen e tretë në të cilën ka luajtur deri më tash. Ndërsa Shaqiri ka luajtur për herë të parë në njëmbëdhjetëshen e parë për FC Bajernin kundër Mainz 05. Ai është zëvendësuar në minutën 75 nga Martinez. Lëndimi i Robbenit dhe Ribery-t i ka siguruar vendin Shaqirit në ekipin e parë.

Ndërkohë që klubi i Xhakës, me gjithë golin e shënuar nga ai, ka humbur me rezultat 2:3 nga FC Nürnbergu, Bayerni i Shaqirit ka shënuar fitore me rezultat 3:1.

Goli i Xhakës ka ardhur në minutën e 53-të prej një gjuajtjeje nga 16 metra largësi. Ky ka qenë goli i dytë, barazues për skuadrën e tij. Të parin e ka shënuar De Jong, që është transferi më i shtrenjtë i të gjitha kohëve i Gladbachut.

Golin e parë kundër Mönchengladbach-ut e ka shënuar Tim Klose, lojtar zviceran që luan për Nürnbergun.