Xhihadisti bën thirrje për sulme terroriste edhe në Zvicër

"Ne do të përhapemi në gjithë Evropën, në Francë, në Belgjikë, Gjermani, Zvicër dhe po ashtu edhe në SHBA"

Pak ditë pas sulmit terrorist në Paris, një xhirim i përhapur nga xhihadistët ka shkaktuar shqetësim në Zvicër. Kjo për faktin se aty, krahas vendeve tjera evropiane dhe SHBA-së, përmendet edhe Zvicra si cak i mundshëm për sulme terroriste.

Në videoxhirimin propagandistik të IS-it, një pjesëtar i organizatës terroriste u drejtohet me thirrje “vëllezërve” të tij xhihadistë që të vrasin “të pafetë” dhe policët në gjithë Evropën dhe në Amerikë, duke përmendur, në mes tjerash edhe Zvicrën.
Të tre IS-istët që flasin në këtë video, flasin në gjuhën frënge ndërsa fjalët e tre përkthehen me shkrim edhe në gjuhën arabe. Sipas portalit që ka publikuar këtë xhirim, (vokativ.com) dy nga tre folësit kanë një aksent arab në frëngjishten e tyre. I treti duket se vjen nga një periferi e qytetit të Parisit.

“Me ndihmën e Zotit ne do të mbërrijmë në Evropë”, ka thënë njëri prej tyre. “Ne do të përhapemi në gjithë Evropën, në Francë, në Belgjikë, Gjermani, Zvicër dhe po ashtu edhe në SHBA. Të gjithë vëllezërve të mi që nuk kanë mundësi të vijnë në Kalifatin Islamik (IS) u them kundërshtoni me të gjitha mjetet, mbytini, therini, ndizni makinat dhe shtëpitë e tyre. Unë u them vëllezërve të mi, kur ta shihni një polic, vriteni. Vritini të gjithët pafetë që i shihni rrugëve”.