Zëdhënësi i Qeverisë: Kosova nuk është pajtuar për kurrfarë autonomie, lajmi në “Fox News”, i paqartë për momentin

Zëdhënësi i Qeverisë së Kosovës, Përparim Kryeziu, në lidhje me lajmin nga mediumi amerikan “Fox News”, ku thuhet se presidentja e Komisionit Evropian, Ursula von der Leyen, gjatë vizitës së fundit në Kosovë dhe Serbi kërkoi njohjen de facto dhe autonomi për serbët e veriut, u shpreh se Kosova nuk ka pranuar dhe as nuk është pajtuar për kurrfarë autonomie, shkruan albinfo.ch.

Kryeziu ka thënë se për momentin është e paqartë nëse lajmi në mediumin amerikan i referohet një citati të drejtpërdrejtë të Presidentes së Komisionit Evropian, Ursula von der Leyen apo është interpretim i vetë mediumit mbi deklarata të presidentes Leyen.

“Ajo çka duam ne të theksojmë është se Kosova nuk ka pranuar e as nuk është pajtuar për kurrfarë autonomie. Ne kemi treguar gatishmërinë tonë për respektim maksimal të të drejtave të çdo anëtari të komuniteteve, sipas standardeve të Këshillit të Evropës, aty ku do të anëtarësohet Republika jonë; por asnjëherë autonomi, defunksionalizim, fragmentim, apo çkado tjetër që nuk e lejon Kushtetuta e Republikës?”, ka thënë ai për RTK.