“Zjarret zombi” vazhdojnë ta kërcënojnë Evropën

Franca po vazhdon të përballet me zjarre, ndërkohë që mungesa e shiut, përveçse po pamundëson shuarjen e zjarreve, ka bërë që shumë lumenj të preken nga thatësia në kontinent. 

Franca po vazhdon të përballet me zjarre, ndërkohë që mungesa e shiut, përveçse po pamundëson shuarjen e zjarreve, ka bërë që shumë lumenj të preken nga thatësia në kontinent.

Një zjarr i madh që ka shkatërruar më shumë se një dyzinë shtëpish dhe çuar në evakuimin e mijëra banorëve po përhapet në rajonin Gironde, në jug-perëndim të Francës.

Autoritetet dyshojnë se situata e krijuar është pasojë e të ashtuquajturve “zjarret zombi”, një zjarr i hershëm që digjet në tokë dhe më pas ndizet përsëri, përcjell Albinfo.ch.

“Ka gjasa që zjarri të jetë përhapur nën tokë dhe më pas të ketë filluar sërish në zona të gjelbërta. Në këtë pikë, flakët, gjithashtu për shkak të thatësirës dhe mungesës së lagështirës, rifilluan me shpejtësi dhe rindezën pishat”, thotë një zjarrfikës.

Me flakët që shkrumbuan 6 mijë hektarë pisha po vazhdojnë të luftojnë rreth 1 mijë zjarrfikës.

Temperaturat përvëluese në Evropë, të shoqëruara nga mungesa e shiut, po prekin lumenjtë e mëdhenj të kontinentit. Autoritetet në Gjermani po paralajmërojnë se niveli i ujit në Rehn mund të arrijë kuotë kritike në ditët e ardhshme, duke vështirësuar transportin e mallrave në të.

Ndërsa në Angli, ku për shkak të të nxehtit është shpallur një alarm kujdesi për shëndetin, burimi kryesor i lumit Tamiz po thahet.

Fillimi më i thatë i këtij viti në dekada ka zhvendosur burimin e lumit ikonë anglez milje të shumta poshtë rrymës, duke lënë pas tokë të djegur dhe pellg të herëpashershëm ku dikur rridhte uji./Albinfo.ch/

---