Zviceranët i besojnë shumë qeverisë së tyre

Vetëm suedezët e duan edhe më shumë se zviceranët qeverinë e tyre. 56% janë shprehur shumë të kënaqur ose relativisht të kënaqur

Sondazhi “European Trusted Brands 2012” i zhvilluar nga magazina “Reader Digest” ka sjellë rezultatet që e nxjerrin qeverinë e Zvicrës si njërën ndër më të besueshmet në Evropë, për popullatën e vet. Ky sondazh është realizuar në 15 ende të Evropës gjatë shtatorit dhe tetorit 2011. Janë pyetur 27467 veta, prej të cilëve 1506 në Zvicër.

54 për qind të të pyeturve janë shprehur se kanë besim të madh ose relativisht të madh në qeverinë federale. Kjo shifër tregon se besimi është rritur për 5% krahasuar me një vit më parë. Por jo vetëm kaq: Përqindja 54% është më shumë se dyfishi i mesatares së kënaqësisë së qytetarëve evropianë me qeveritë e tyre. Kjo mesatare është 22%.

Vetëm suedezët e duan edhe më shumë se zviceranët qeverinë e tyre. 56% janë shprehur shumë të kënaqur ose relativisht të kënaqur me qeverinë suedeze.

Besimin e qytetarëve, bazuar në sondazhin e përmendur, e gëzojnë edhe nëpunësit shtetërorë. Në përqindje, kjo besueshmëri është rritur nga 37 në 45% krahasuar me vitin e kaluar. Ndërkaq, bankat kanë pësuar humbje besimi për 7 për qind. Po ashtu edhe BE-ja gëzon 5 për qind më pak besim te qytetarët e anketuar të Zvicrës, krahasuar me vitin e kaluar.

Bazuar në këtë sondazh, zviceranët bartin një rekord interesant: vetëm 14 për qind të tyre i besojnë Bashkimit Evropian. Mesatarja e besimit në 15 vendet ku është realizuar sondazhi ka qenë 30%.