Zvicra e ndihmon Kosovën me një shkollë profesionale për kontroll teknik

Është biseduar për mundësinë e përkrahjes në hapjen e një shkolle profesionale në Kosovë e cila do të ndihmonte zhvillimin e kuadrove profesionale në lëminë e kontrolleve teknike dhe servisimin e automjeteve

Ministri i Infrastrukturës, Pal Lekaj, në takimin që ka pasur sot me  përfaqësues të Unionit Profesional të Zvicrës për Automjete ka biseduar për mundësinë e përkrahjes në hapjen e një shkolle profesionale në Kosovë e cila do të ndihmonte zhvillimin e kuadrove profesionale në lëminë e kontrolleve teknike dhe servisimin e automjeteve.

“Ideja është që fëmijët e Kosovës të arsimohen dhe të punësohen në Kosovë”, ka shkruar Lekaj në facebook.

Lidhur me nevojën e ngutshme të Kosovës për të pasur një shkollim më efikas në profesionet teknike, muaj më parë një delegacion nga po kjo ministri kishte zhvilluar një vizitë pune në Zvicër. Atëbotë ishte arritur ujdia që një delegacion i Unionit Profesional të Zvicrës për Automjete do të vizitonte Kosovën gjatë muajit tetor, me ofertat konkrete nga fusha që mbulon. albinfo.ch kishte raportuar gjerësisht nga kjo vizitë.