Zvicra nuk paguan ndihmë për personat me aftësi të kufizuara që jetojnë jashtë vendit

Zvicra vazhdon të refuzojë pagesën e shtesës për kujdes (ndihmë për persona të varur) për pensionistët me aftësi të kufizuara që jetojnë jashtë territorit të saj, duke lënë shumë prej tyre pa mbështetje financiare për nevojat e përditshme.

Rasti i pensionistes Scarlett Laney McKenzie ka rikthyer në vëmendje këtë çështje. Ajo ka punuar dhe kontribuar për vite në Zvicër, por pasi u zhvendos në Spanjë, humbi të drejtën për të përfituar ndihmën për kujdes, pavarësisht gjendjes së rënduar shëndetësore. Spanja, nga ana tjetër, nuk e mbulon pasi ajo nuk ka kontribuar në sistemin e saj social, transmeton albinfo.ch.

Sipas ligjit zviceran, kjo ndihmë u jepet vetëm personave që banojnë brenda vendit. Edhe pse rregullat evropiane parashikojnë që përfitimet sociale të ndiqen nga qytetarët në vendet ku ata jetojnë, Zvicra ka bërë përjashtim në marrëveshjen për lëvizjen e lirë.

Ekspertët ligjorë vlerësojnë se kjo politikë është e qëllimshme dhe nuk presin ndryshime, edhe pse çështja është dërguar në Gjykatën Federale. Ndërkohë, shumë pensionistë dhe persona me aftësi të kufizuara që jetojnë jashtë Zvicrës vazhdojnë të përballen me kosto të larta për kujdesin e përditshëm.