Zvicra riatdheson për herë të parë fëmijë nga Siria

Vajzat gjithashtu shprehën dëshirën që të kthehen në Zvicër për të jetuar me baballarët e tyre

Dy fëmijë me kombësi zvicerane do të riatdhesohen nga Siria veriore pa nënën e tyre, e cila dikur i përkiste grupit terrorist Shteti Islamik, raportoi RTS. Kjo do të jetë hera e parë që Zvicra organizon një riatdhesim të tillë.

Dy vajzat e moshës 9 dhe 15 vjeç do të kthehen në Gjenevë. Baballarët e vajzave kanë bërë thirrje për riatdhesimin e tyre prej disa muajsh.

Në vitin 2016, fëmijët u dërguan nga nëna e tyre e radikalizuar rëndë në një zonë të Sirisë nën kontrollin e grupit terrorist Shteti Islamik, përcjell albinfo.ch.

Riatdhesimi po bëhet me miratimin e nënës së vajzave, e cila prej kohësh refuzonte t’i linte të iknin. Vajzat gjithashtu shprehën dëshirën që të kthehen në Zvicër për të jetuar me baballarët e tyre.

Sipas ambasadorit Johannes Matyassy, ​​riatdhesimi është rezultat i një strategjie afatgjatë që përfshinte baballarët që udhëtonin në kufirin irakian për t’u takuar me vajzat e tyre.

Duket se dy të miturat u liruan nga një kamp në veri të Sirisë në një operacion që u zhvillua pa asnjë ndihmë nga ushtria zvicerane.

Dy vajzat do të jenë përgjegjësi e kantonit të Gjenevës me ndihmën e policisë kantonale për t’u siguruar që ato nuk paraqesin rrezik për sigurinë e brendshme të Zvicrës.

Riatdhesimi u bë në kuadër të një vendimi të marrë nga Këshilli Federal më 8 mars 2019.

---