Zvicra të marrë pjesën e saj të kontributit për krizën e Euros

Me kreditë prej 25 miliardë frangash Zvicra do të bëhej pjesë e «parashutës shpëtimtare» për shtetet evropiane të futura në borgje

Pas Qeverisë së Zvicrës edhe komisioni për punë të jashtme i Parlamentit Nacional ka shprehur qëndrimin se Zvicra duhet të japë kontributin e saj në tejkalimin e krizës së euros.

Në këtë drejtim, komisioni në fjalë rekomandon miratimin e marrëveshjeve përkatëse të kredive me Fondin Monetar ndërkombëtar, shkruan drs.ch. Bëhet fjalë për kreditë prej 25 miliardë frangash, me të cilat Zvicra do të bëhej pjesë e të ashtuquajturës «parashutë shpëtimtare» për shtetet evropiane të futura në borgje të mëdha.

Kjo shumë të hollash, sipas komisionit, do të shërbente vetëm si garanci ndërsa pagesa konkrete do të bëheshin vetëm në raste emergjente. Komisioni për punë të jashtme gjithashtu ka propozuar të ngrihet shuma e fondit për ndihmën e jashtme për zhvillim, me 640 milionë franga për këtë vit dhe vitin tjetër.

Synimi i kësaj rritjeje fondi është që deri në vitin 2015 ndihmat që Zvicra do të japë për zhvillim të arrijnë 0.5 % të bruto prodhimit nacioonal të Zvicrës.