Zyrtare: Stadiumi “Fadil Vokrri” pranohet nga UEFA

Pas certifikimit të stadiumit nga UEFA, tani fjalën finale do ta ketë Ministria e Sportit, me ç’rast do ta bëjë pranimin teknik të punëve

Stadiumi ‘Fadil Vokrri’ në Prishtinë është pranuar zyrtarisht nga UEFA si stadiumi i kategorisë së katërt, ku do të zhvillohen ndeshjet e Kosovës dhe klubeve kosovare.

Shtëpia më e madhe e futbollit evropian e ka licencuar stadiumin “Fadil Vokrri” pasi ka konstatuar i përmbushë kriteret e kategorisë së katërt bazuar në rregulloret e UEFA-s, përcjell albinfo.ch.

Gjithsesi është rekomanduar përfundimi i disa punëve të papërfunduara para datës 10 shtator, kur Kosova do të zhvillojë duelin e parë në Ligën e Kombeve përballë Ishujve Faroe.

“UEFA, sot,  e ka njoftuar zyrtarisht Federatën e Futbollit të Kosovës se stadiumi “Fadil Vokrri” në Prishtinë pas renovimit të tërësishëm i ka plotësuar kriteret dhe është licencuar për zhvillimin e ndeshjeve të Ligës së Kombeve. Kësisoj, më 10 shtator, në orën 20:45, Kombëtarja e Kosovës do ta zhvillojë ndeshjen e parë në shtëpi kundër Ishujve Faroe, në kuadër të Ligës së Kombeve, tri ditë pasi do ta bëjë debutimin në këtë garë në Baku, në përballje me Azerbajxhanin”, thuhet në kumtesën e FFK-së.

Stadiumi “Fadil Vokrri” është rinovuar me investimin e Ministrisë së Sportit, derisa ka zgjatur dy vite. Kapaciteti tashmë i stadiumit është 13.500 ulëse.

---