Kina, ndër pesë vendet me më së shumti vizitorë në Shqipëri

Sipas të dhënave, më shumë se 50 mijë kinezë kanë vizituar Shqipërinë deri tani këtë vit

Heqja e vizave për Kinën ka shumëfishuar numrin e turistëve këtë sezon. Në një intervistë për një televizion kinez, ministri i Turizmit të Shqipërisë, Blendi Klosi, është shprehur se po punohet për krijimin e një pakete të re me një ofertë të trashëgimisë kulturore dhe kulinarisë dhe po promovohet agroturizmi më shumë se çdo gjë tjetër në Shqipëri.

Qeveria shqiptare vendosi heqjen e vizave për turistët nga Kina për periudhën 1 prill deri në 31 tetor 2018. Heqja e vizave me Kinën për 8 muaj në vit ka dhënë rezultatet e para, raporton ‘Scan’.

Numri i turistëve nga Kina drejt Shqipërisë është shumëfishuar krahasuar me një vit më parë. Falë heqjes së vizave, ky shtet u rendit me shpejtësi në pesë vendet me më shumë vizitorë në Shqipëri, përcjell albinfo.ch.

Sipas të dhënave, më shumë se 50 mijë kinezë kanë vizituar Shqipërinë deri më tani në këtë vit.

Televizioni kinez rendit gjithashtu atraksionet më të mëdha turistike në Shqipëri, sipas renditjes vendi i parë më i vizituar nga turistët kinezë është Bunk’art, i ndjekur nga muzeu i komunizmit në Shqipëri, kjo për shkak edhe të lidhjeve historike mes dy vendeve.