1268 barka gome në parakalim: Rekord botëror

Të shtunën janë takuar në Bernë amatorët e barkave të gome, për të marrë pjesë në lundrimin unik dhe shumë masiv me këtë lloj barkash nëpër lumin Aare.

Sipas deklarimit të organizatorëve, me këtë rast është vendosur një rekord botëror: në parakalimin nga stacioni Kiesen e deri në Bernë, nëpër Aare kanë marrë pjesë plot 1268 veta me barkat e tyre të gomës.

Ndërkaq, entuziazmin e organizatorëve nuk e kanë ndarë edhe Policia Kantonale e Bernës dhe Shoqëria Zvicerane e Shpëtimtarëve në ujë. Ata kanë shprehur brengosje për sigurinë e një parakalimi të tillë dhe kanë sugjeruar që ai të mos mbahej fare.