Shqipëria
34% e familjeve shqiptare në vështirësi për të paguar rrymën dhe ujin
Në Serbi, pjesa e familjeve që kanë vështirësi për të paguar faturën e ujit dhe energjisë është 21 për qind, në Kosovë 20 për qind, ndërsa në Maqedoni, Bosnje dhe Mal të Zi, shifra luhatet nga 14 deri në 16 për qind

Faturat e shërbimeve publike janë një barrë e rëndë për shumë familje shqiptare, duke vënë në vështirësi financiare mbi një të tretën e popullsisë.
“Pagova dritat, uji s’ka ardhur, vjen më vonë. Ekonomia shtëpiake është e shtrënguar. Ne jemi në pension edhe del edhe s’del, por ja me nikoqirllëk”, thotë një qytetar shqiptar.
Sipas një raporti të financuar nga Komisioni Evropian, 34 për qind e familjeve shqiptare kanë vështirësi për të paguar faturat e dritave (rrymës) dhe të ujit.
Kjo është shifra më e lartë në rajon, me diferencë të ndjeshme nga vendet e tjera, raporton “TCH”.
Në Serbi, pjesa e familjeve që kanë vështirësi për të paguar faturën e ujit dhe energjisë është 21 për qind, në Kosovë 20 për qind, ndërsa në Maqedoni, Bosnje dhe Mal të Zi, shifra luhatet nga 14 deri në 16 për qind, përcjell albinfo.ch.
Katër vjet më parë, qeveria shqiptare rriti me mbi 20 për qind tarifat e energjisë për shumicën e konsumatorëve familjarë, ndërkohë që nga 1 janari i këtij viti enti rregullator shtrenjtoi me mbi 40 për qind përnjëherë çmimin e ujit.
Por përveç rritjes së çmimit, faturat e shërbimeve publike rëndohen edhe nga taksat e shumta që qeveria ka ngarkuar mbi to si tarifa e pastrimit, taksa e shkollave apo ajo e pronës. Të gjitha këto bëjnë që mbi 250 mijë familje shqiptare të vihen në vështirësi serioze për të shlyer faturën e rrymës dhe ujit.
Të ngjashme
Të tjera nga Shqipëria
Jeta në Zvicër
-
Nga viti 2026, afro 100 njësi të sapondërtuara do të jepen me qira në Cyrih Agjencia e pasurive të paluajtshme të Cyrihut përdor metoda “perverse” për të vlerësuar pritjet e qirasë...
-
Treni “European Sleeper” ngatërron linjën, përfundoi shumë larg destinacionit
-
Siguruesit shëndetësorë kundërshtojnë tarifat e larta të klinikave
-
Salla të reja operative në Spitalin e Gjenevës
-
Zvicër: Këto janë destinacionet më shpesh të rishikuara nga Google