5 raste me Omicron në Mal të Zi

Keystone EPA/BORIS PEJOVIC

Pesë raste të variantit Omicron të koronavirusit janë konfirmuar zyrtarisht në Mal të Zi, njoftoi Instituti i Shëndetit Publik të vendit.

“Të gjitha rastet e konfirmuara të infeksionit sot janë në gjendje të mirë të përgjithshme shëndetësore, me simptoma të lehta. Shërbimet epidemiologjike monitorojnë dhe identifikojnë kontaktet me rrezik të lartë të personave të infektuar”, thuhet në deklaratë.

Dyshimi i parë u konstatua më 4 dhjetor në një familje në fillim të muajit, pas së cilës të gjitha kontaktet e tyre u vendosën në izolim.

Në 24 orët e fundit në Mal të Zi janë konfirmuar 187 raste të reja me COVID-19 dhe dy persona kanë vdekur si pasojë e virusit, njofton Instituti i Shëndetit Publik.

Mali i Zi ka në total 1812 raste aktive me COVID-19. 42.8 për qind e popullatës janë të vaksinuar me dozën e dytë të vaksinës, ndërsa rreth 10.5 për qind e qytetarëve janë imunizuar me dozën e tretë.