7 nga 10 austriakë janë vaksinuar të paktën një herë

(KEYSTONE/Anthony Anex)

Shtatë në dhjetë persona në Austri janë vaksinuar kundër Covid-19 të paktën një herë. Kështu tregojnë të dhënat e fundit nga regjistri elektronik i vaksinimeve të publikuara nga Ministria e Shëndetësisë, shkruan albinfo.at.

Sipas raportit të publikuar nga mediat austriake, deri ditën e hënë  (22.11) 6.2 milionë (69.9 për qind e popullsisë) kishin të paktën dozën e parë të vaksinimit kundër koronës, 327,000 prej tyre vetëm në muajin nëntor.

Me masat rigoroze, të cilat ka ndërmarrë ditëve të fundit qeveria austriake, sidomos për personat që nuk i binden vaksinimit dhe me rritjen e rasteve të reja, numri i kërkesave për vaksinim për herën e parë është rritur ndjeshëm në fund të tetorit dhe fillim të muajt nëntor.

Sa për krahasim, derisa në fund të tetorit ishin vaksinuar vetëm 66 për qind e popullsisë në Austri me të paktën një vaksinë, tri javë më vonë, shifra ka arritur në 69.9 për qind. Ndërkohë sipas statistikave, përqindja e banorëve të cilët kanë marrë dy dozat e vaksinimit dhe posedojnë certifikatë vaksinimi është 66 për qind.

Kërkesa të mëdha edhe për vaksinën përforcuese

Po ashtu në tri javët e fundit janë rritur ndjeshëm kërkesat edhe për dozën e tretë të vaksinimit. Pothuajse 1.3 milion (14.3 për qind) e banorëve kanë marrë edhe dozën përforcuese.

Në raportin e fundit të ditës së martë numri i infeksioneve të reja ka pësuar rënie, dhe ishte 9.513 raste të reja, ndërkohë rritje kishte numri i të vdekurëve nga Covid -19, që brenda 24 orëve u raportuan 72 raste.