7 policë të lënduar në protestën e opozitës në Shqipëri

Keystone EPA/MALTON DIBRA

Shtatë efektivë policie rezultojnë se janë lënduar nga mjetet shpërthyese të hedhura nga protestuesit në Tiranë, e për këtë ka reaguar edhe Ministri i Brendshëm i Shqipërisë, Sandër Lleshaj, i cili i kërkon kryedemokratit Lulzim Basha që t’u bëjë thirrje protestuesve të ndalojnë sulmin ndaj forcave të policisë.

“Një oficer policie është dëmtuar nga mjetet e ndaluara shpërthyese që hodhën protestuesit. Drejtuesit e protestave duket se kanë financa të mëdha për të blerë mjete shpërthyese të ndaluara, por edhe vullnet të plotë për të goditur forcat e rendit. I bëj thirrje Lulzim Bashës që të ndalojë sulmin ndaj forcave të Policisë së Shtetit!”, shkruan Lleshaj, raportojnë mediat shqiptare.

Pikërisht ministri Lleshja ka bërë të ditur edhe numrin e efektivëve të lënduar, përcjell albinfo.ch.

“Ka mbërritur në shtatë numri i policëve të plagosur nga sulmi i militantëve të Lulzim Bashës. Për këtë do të ketë përgjegjësi përpara ligjit”, shkruan Lleshaj në një postim tjetër.