“Shok”, filmi kosovar që nominohet për Oscar

Filmi "Shok", me regji dhe skenar të Jamie Donoughue, ka hyrë në kategorinë e filmit më të mirë të shkurtër "Live Action Short Film"

Për herë të parë, një film kosovar ka arritur të nominohet për titullin më prestigjioz botëror “Oscar” si filmi më i mirë i shkurtë. Ky është filmi “Shok”, me regji dhe skenar të Jamie Donoughue, i cili ka hyrë në kategorinë e filmit më të mirë të shkurtër “Live Action Short Film”.

Ngjarja në këtë film zhvillohet gjatë periudhës së luftës në Kosovë, derisa dy shokë vënë në provë shoqërinë e tyre, gjatë luftës për mbijetesë. Filmi është mbështetur nga Qendra Kinematografike e Kosovës, me producentë Eshref Durimishi dhe Harvey Ascott.

“Shok” është filmi i parë kosovar që arrin të nominohet për çmimin Oscar dhe po cilësohet si suksesi më i madh në historinë e kinematografike kosovare.

“Shok” është mbështetur nga Qendra Kinematografike e Kosovës, ndërsa në kohën prej njëzet e një minuta, sa zgjatë gjithsejtë ky film, luajnë edhe aktorët: Lum Veseli, Andi Bajgora, Melihate Qena, Luan Kryeziu, Astrit Kabashi, Xhevdet Jashari, Armond Morina, Aurita Agushi, Sunaj Raça, Eni Cani, Kushtrim Sheremeti, Fisnik Ademi, Besnik Krapi dhe Ardit Tahiri.

Xhirimet e filmit janë realizuar në qytetin e Mitrovicës, ndërkohë producenti i tij, Eshref Durmishi, i cili e portretizon rolin e Dushanit, ka theksuar se përmes pamjeve në këtë film shfaqet një pjesë e rrugëtimit të shqiptarëve gjatë luftës së fundit në Kosovë. Ky film është shpërblyer edhe në shumë festivale të tjera të filmit.